Öflug ný jarðhitahola í landi Kílhrauns í Áshildarmýri á Skeiðum

Borun nýrrar vinnsluholu fyrir Hitaveitu Kílhrauns í Áshildarmýri á Skeiðum lauk um helgina með mjög góðum árangri. Holan gefur um 80°C heitt vatn og fyrstu niðurstöður benda til mikillar afkastagetu. Jarðfræðingar ÍSOR staðsettu holuna, en stofnunin hefur komið að jarðhitaleit á svæðinu frá upphafi.

Jarðhitaleit í landi Kílhrauns á Skeiðum hófst fyrir um áratug. Engin sýnileg merki voru um jarðhita á yfirborði og því hófst leitin með borun hitastigulsholna til að afla upplýsinga um hita og jarðfræðilegar aðstæður undir yfirborði.

Jarðfræðingarnir Árni Hjartarson og Kristján Sæmundsson hjá ÍSOR leiddu jarðhitaleitina á sínum tíma. Sú vinna skilaði árangri og árið 2017 var boruð vinnsluhola sem hefur síðan verið eina vinnsluhola Hitaveitu Kílhrauns.

Hitastig vatnsins er um 80°C og benda fyrstu niðurstöður til þess að taka megi yfir 50 L/s af vatni úr henni í dælingu

Nú hefur stórt skref verið stigið í frekari uppbyggingu hitaveitunnar. Um helgina lauk borun nýrrar vinnsluholu í Áshildarmýri sem staðsett var af jarðfræðingum ÍSOR, Sigurði Kristinssyni og Auði Óladóttur.

Holan var boruð með jarðbornum Trölla frá Ræktunarsambandi Flóa og Skeiða og náði hún 792 metra dýpi. Við loftblástur í borlok varð ljóst að um verulega vatnsgæfa borholu er að ræða. Hitastig vatnsins er um 80°C og fyrstu niðurstöður benda til þess að taka megi yfir 50 lítra á sekúndu úr holunni með dælingu.

Frekari mælingar og prófanir munu gefa nánari upplýsingar um afkastagetu holunnar, en niðurstöðurnar nú þegar lofa mjög góðu. Árangurinn í Áshildarmýri er gott dæmi um mikilvægi markvissrar jarðhitaleitar. Þótt engin merki um jarðhita hafi verið sýnileg á yfirborði þegar leit hófst fyrir um áratug hefur kerfisbundin rannsóknarvinna, frá hitastigulsmælingum og jarðfræðilegri túlkun til staðsetningar vinnsluholna, nú skilað öflugri jarðhitaauðlind sem getur stutt við áframhaldandi uppbyggingu á svæðinu.

Jarðfræðingar ÍSOR að störfum við vinnsluholuna í Áshildarmýri

RÚV fjallaði um borunina og ræddi þar við eigendur hitaveitunnar og borstjóra Ræktunarsambands Flóa og Skeiða. Þar kemur fram að á svæðinu séu allt að 300 lóðir þar sem aðgengi að heitu vatni geti skipt miklu fyrir áframhaldandi uppbyggingu. Johnny Símonarson borstjóri lýsir holunni jafnframt sem einni af betri borholum á svæðinu. Kristín Rós Hlynsdóttir, eigandi hitaveitunnar, segir nýju holuna skapa góða auðlind fyrir svæðið og telur vatnið geta dugað fyrir heilt sveitarfélag á borð við Skeiða- og Gnúpverjahrepp.

Hér fyrir neðan er frétt RÚV.

Heilmikið af heitu vatni fannst í Áshildarmýri í Skeiða- og Gnúpverjahreppi

Jarðborinn Trölli frá Ræktunarsambandi Flóa og Skeiða

Öflug þátttaka ÍSOR á World Geothermal Congress í Calgary 2026

ÍSOR tók virkan þátt í World Geothermal Congress 2026 sem haldin var í Calgary í Kanada dagana 8.–12. júní. Ráðstefnan er stærsti alþjóðlegi vettvangur fagfólks á sviði jarðhita og jarðvísinda og sækja hana helstu sérfræðingar og fulltrúar fyrirtækja og stofnana  víðs vegar að úr heiminum. Alls tóku 16 starfsmenn ÍSOR þátt í ráðstefnunni í ár með erindum  allt frá vöktun til  sjálfbærrar nýtingar á sviði jarðvísinda, ásamt því að taka þátt í pallborðsumræðum.

Gunnar Kaldal með erindi um skriðtengin

Mikill áhugi var á skriðtengjum ÍSOR (flexible Coupling), sem er íslensk einkaleyfisvarin nýsköpun sem þróuð hefur verið til notkunar í háhitaborholum. Lausnin vakti mikla athygli meðal ráðstefnugesta og þótti skýrt dæmi um hvernig íslensk þekking og reynsla getur leitt til nýrra tæknilausna fyrir jarðhitaiðnaðinn.

Jarðfræðingarnir okkar Steinþór, Sveinborg og Helga Margrét

Þátttaka ÍSOR á World Geothermal Congress 2026 var mikilvægt tækifæri til að miðla íslenskri þekkingu á alþjóðavettvangi, efla samstarf við sérfræðinga og samstarfsaðila um allan heim og fylgjast með nýjustu þróun á sviði jarðhita og jarðvísinda.

ÍSOR þakkar skipuleggjendum ráðstefnunnar og öllum þátttakendum fyrir fróðlegar umræður, verðmæt tengsl og ánægjulegt samstarf.

Eftirfarandi myndir eru af rokkstjörnunum okkar, ÍSOR teymið í action!

ÍSOR teymið mætt í höllina
Alexandra Kristín Hafsteinsdóttir með erindi sitt um Perlufestina og Reykjanesskagann
Alexandra Kristín
ÍSOR mætt í íslenska básinn
Egill Árni Guðnason með erindi um Eyjafjörðinn
Helga Margrét jarðfræðingur fjallar um lághita á Íslandi
Steinþór Níelsson með fyrirlestur um skriðtengin
Bjarni Richter með erindi um Jarðhitaskólann GRÓ GPT
Færri komust að en vildu er Auður Agla Óladóttir hélt erindi sitt
Árni Magnússon og Einar Hansen Tómasson
Sveinborg fræðir áhugasama við íslenska básinn

ÍSOR þátttakandi á GeoTHERM expo & congress í Offenburg þar sem lághiti var í brennidepli

Jarðfræðingarnir Auður Agla Óladóttir og Sveinborg Hlíf Gunnarsdóttir voru fulltrúar ÍSOR á ráðstefnunni GeoTHERM expo & congress sem haldin var í Offenburg í Þýskalandi í lok febrúar. Um er að ræða einn helsta viðburð Evrópu fyrir fagfólk í jarðhita og sannkallaðan vettvang fyrir miðlun þekkingar og tengslamyndun innan greinarinnar.

Auður Agla og Sveinborg ásamt samstarfsaðilum ÍSOR frá Arctic Green Engineering Services

Ráðstefnuvikan hófst á vinnustofu um lághita sem var skipulögð og haldin af GEOTHERMICA Initiative. Á vinnustofunni var rætt um leiðir til að takast á við þær áskoranir sem fylgja uppbyggingu og nýtingu lághita. Þótt Ísland sé þekkt fyrir háhitasvæði eru hér á landi einnig svæði með lægri hitastigli og minni lekt sem krefst annarrar nálgunar við rannsóknir og nýtingu. ÍSOR hefur verið í fararbroddi við könnun og þróun slíkra svæða og byggt upp dýrmæta þekkingu á því sviði. 

Á vinnustofunni kynnti Auður Agla starfsemi ÍSOR, uppbyggingu hitaveitu og nýjustu framfarir í jarðhitarannsóknum á Vestfjörðum, þar sem Orkubú Vestfjarða vinna að því markmiði að skipta út rafknúinni hitaveitu fyrir hitaveitu með jarðhita. Verkefnið er mikilvægt skref í átt að aukinni sjálfbærni og hagkvæmari orkulausnum fyrir íbúa svæðisins. 

Auður Agla Óladóttir jarðfræðingur hjá ÍSOR að kynna nýjustu framfarir í lághita á Vestfjörðum

Samtöl og umræður á ráðstefnunni endurspegluðu skýrt að jarðhiti – ekki síst lághiti– fær nú verðskuldaða athygli í Evrópu. Vaxandi áhugi á sjálfbærum orkugjöfum og orkuöryggi hefur aukið vægi jarðhita sem raunhæfan og áreiðanlegan valkost.

ÍSOR nýtti jafnframt tækifærið á ráðstefnunni til að funda með samstarfsaðilum sínum hjá Arctic Green Engineering Services og skipuleggja næstu verkefni. ÍSOR er reiðubúið að veita samþætta ráðgjafarþjónustu fyrir ört vaxandi jarðhitamarkað í Evrópu. Tækifærin eru fjölmörg og við hlökkum til að kanna þau áfram í samstarfi við nýja sem og núverandi samstarfsaðila.

Alþjóðadagur kvenna í vísindum – 11. febrúar 2026

Í dag, 11. febrúar er Alþjóðadagur kvenna og stúlkna í vísindum. Af því tilefni viljum við hjá ÍSOR varpa ljósi á þær frábæru konur sem starfa meðal okkar og leggja sitt af mörkum til rannsókna og gegna lykilhlutverki í vöktun og sjálfbærri nýtingu á sviði jarðvísinda og náttúruauðlinda.

Hluti af teymi ÍSOR samankomnar

ÍSOR konur koma að fjölbreyttum verkefnum, allt frá vettvangsvinnu úti í náttúrunni til gagnagreiningar, ráðgjafar og alþjóðlegs samstarfs. Þær rannsaka jarðhita og grunnvatn, fylgjast með jarðhræringum, vinna að umhverfismati og þróa lausnir sem styðja við sjálfbæra nýtingu auðlinda. Starfið er bæði krefjandi og spennandi þar sem enginn dagur er eins.

Þær eru mikilvægur hluti af öflugu teymi sérfræðinga sem vinnur saman að því að auka skilning okkar á náttúrunni og nýtingu hennar.

Þorbjörg Ágústsdóttir jarðeðlisfræðingur í vettvangsferð á Reykjanesinu
Auður Agla jarðfræðingur ÍSOR að störfum

Í dag eru konur um 40% hluti af teymi ÍSOR en fyrir tuttugu árum voru þær eingöngu um 23%, sem sýnir skýra og ánægjulega þróun. Sú aukning endurspeglar bæði breyttan veruleika í vísindasamfélaginu og markvissa áherslu á fjölbreytileika og jafnrétti í starfsumhverfi okkar. 

Steinunn Hauksdóttir jarðfræðingur

Á þessum degi viljum við því jafnframt hvetja stúlkur og ungar konur til að skoða möguleika í vísindum og tækni – þar eru fjölmörg spennandi tækifæri sem bíða þeirra.

Við hjá ÍSOR ætlum að halda áfram að byggja upp fjölbreytt og öflugt vísindasamfélag þar sem hæfileikar fá að njóta sín – og tryggja að næstu tuttugu ár sýni enn frekari framfarir.

Sveinborg Hlíf Gunnarsdóttir jarðfræðingur í felti
Alexandra og Katrín, ný kynslóð ÍSOR jarðfræðinga í felti

Alexandra K. Hafsteinsdóttir hlýtur Nýsköpunarverðlaun forseta Íslands og Hugo Alejandro Arteaga Vivas sérstaka viðurkenningu fyrir verkefni unnin hjá ÍSOR

Alexandra K. Hafsteinsdóttir, nemandi í meistaranámi í jarðfræði við Háskóla Íslands og starfsmaður ÍSOR, hlaut Nýsköpunarverðlaun forseta Íslands fyrir verkefni sitt Kortlagning grunnvatns á Reykjanesskaga. Jafnframt hlaut Hugo Alejandro Arteaga Vivas, nemandi í meistaranámi í jarðeðlisfræði við Háskóla Íslands, sérstaka viðurkenningu forseta Íslands fyrir verkefnið Vöktun á útbreiðslu gufupúða á háhitasvæðum.

Bæði verkefnin voru unnin hjá ÍSOR og byggja á rannsóknum sem hafa mikilvægt gildi fyrir vöktun og nýtingu náttúruauðlinda á Íslandi.

Verðlaunin afhenti Halla Tómasdóttir forseti Íslands við hátíðlega athöfn á Bessastöðum þriðjudaginn 20. Janúar 2026.

Halla Tómasdóttir forseti Íslands afhendir Alexöndru nýsköpunarverðlaunin við hátíðlega athöfn á Bessastöðum. Ljósmynd Arnaldur Halldórsson

Kortlagning grunnvatns á Reykjanesskaga – Alexandra K. Hafsteinsdóttir

Markmið rannsóknar Alexöndru var að kortleggja grunnvatnsstrauma á Reykjanesskaga með því að mæla leiðni (seltu) og greina anjónir í ferskvatni víðsvegar á skaganum, á sama tíma og þróað var verklag í kringum nýja rafknúna vatnsdælu. Tekin voru 24 sýni af grunnvatni víðsvegar á skaganum sumarið 2025 úr grunnum ferskvatns borholum. Í tíu borholum voru tekin sýni með nýju dælunni, sem fengið hefur viðurnefnið „Perlufestin“. Hún er einstaklega þægilegt og fyrirferðarlítið verkfæri til sýnatöku, ólíkt hefðbundnum vatnsdælum sem eru sverar, þungar, og knúnar áfram af stórum rafstöðvum.

Perlufestin hentar vel til sýnatöku úr grönnum ferskvatnsholum sem ekki er hægt að koma hefðbundinni borholudælu í, og auðvelt að flytja hana fótgangandi milli staða sem eru annars óaðgengilegir. Leiðni og anjónir voru mældar í vatnssýnunum, og niðurstöður greininganna settar fram á kortum sem sýna dreifingu þeirra á skaganum. Niðurstöðum ber vel saman við fyrri rannsóknir á vatnafari skagans. Skýr skil eru milli vatnasvæða, sem tengjast mismunandi berggrunni á hverju svæði fyrir sig. Níunda eldgosið á Sundhnúkagígaröðinni hófst við framkvæmd rannsóknarinnar. Fjöldi sýna voru tekin í návígi við gosstöðvarnar á meðan á því stóð, og þau borin saman við eldri gögn af svæðinu. Niðurstöður efnagreininga sýna sem voru tekin benda ekki til þess að eldvirkin hafi markverð áhrif á efnasamsetningu grunnvatnsins, en lítil sem engin breyting er á efnainnihaldi grunnvatns á svæðinu frá upphafi mælinga.

Leiðbeinendur Alexöndru voru Sveinborg Hlíf Gunnarsdóttir, Finnbogi Óskarsson, Auður Agla Óladóttir og Sigurður Garðar Kristinsson jarðfræðingar hjá ÍSOR.

Halla Tómasdóttir forseti Íslands og Hugo við athöfnina á Bessastöðum. Ljósmynd Arnaldur Halldórsson

Vöktun á útbreiðslu gufupúða á háhitasvæðum – Hugo Alejandro Arteaga Vivas

Á háhitasvæðum í vinnslu eru heitt vatn og gufa unnin úr jörðu í gegnum borholur, og er gufan nýtt til þess að knýja túrbínur til raforkuframleiðslu. Með tímanum getur vinnsla leitt til þess að gufumagn eykst og s.k. gufupúði myndast vegna þrýstingslækkunar í jarðhitakerfinu. Til þessa hefur engin bein leið verið til að vakta þróun slíkrar gufupúðamyndunar önnur en stakar mælingar í borholum. Í nýlegri grein Pilar Sánchez-Pastor o.fl. (2023),er sýnt fram á aðferð sem notar s.k. jarðsuð til þess að fylgjast samfellt með breytingum í gufumagni í jarðhitakerfum. Jarðsuð er hægt að mæla með jarðskjálftamælum, og er forsenda aðferðarinnar sú að jarðskjálftabylgjur ferðast hægar í gegnum gufumettuð svæði en vatnsmettuð.

Markmið verkefnisins var að nýta og þróa áfram þessa aðferð út frá samfelldum mælingum á jarðsuði. Í verkefninu voru þróuð forrit til gagnaúrvinnslu og myndrænnar framsetningar, og var þeim beitt á þrjú ár af jarðskjálftagögnum frá nokkrum jarðskjálftastöðvum í nágrenni vinnslusvæðis jarðhita á Hellisheiði.

Vel tókst að endurskapa fyrri niðurstöður sem eru í samræmi við mælda þrýstingslækkun og landsig af völdum vinnslunnar á svæðinu. Verkefnið sýndi því fram á að þessa aðferð sé hægt að nýta til þess að fylgjast samfellt með breytingum í gufumagni á jarðhitasvæðum á hagkvæman hátt. Næstu skref eru að þróa og prófa aðferðina á öðrum jarðhitasvæðum í nýtingu.

Leiðbeinendur Hugo voru Þorbjörg Ágústsdóttir jarðeðlisfræðingur og sérfræðingur í jarðskjálftarannsóknum, Egill Árni Guðnason jarðeðlisfræðingur og Rögnvaldur L. Magnússon eðlisfræðingur hjá ÍSOR ásamt Pilar Sánchez-Pastor hjá GEO3BCN.

Halla Tómasdóttir forseti Íslands, Alexandra og Hugo við hátíðlega athöfn á Bessastöðum

Nýsköpunarverðlaun forseta Íslands voru fyrst veitt árið 1996.

Í stjórn sjóðsins 2023-2026 sitja: Björgvin Stefán Pétursson, formaður, skipaður án tilnefningar, Sævar Helgi Bragason, tilnefndur af vísindanefnd Vísinda- og tækniráðs, Ásdís Jóhannesdóttir, tilnefnd af Samtökum iðnaðarins, Alexandra Briem, tilnefnd af Sambandi íslenskra sveitarfélaga og Erla Guðbjörg Hallgrímsdóttir, tilnefnd af Landssamtökum íslenskra stúdenta.

Verðlaunin eru veitt þeim námsmönnum sem hafa unnið framúrskarandi starf við úrlausn verkefna sem styrkt voru af Nýsköpunarsjóði námsmanna árið 2025 en sjóðurinn heyrir undir menningar-, nýsköpunar- og háskólaráðuneytið.

Tilkynning Nýsköpunarsjóðs námsmanna

Alexandra og Hugo fagna með leiðbeinendum sínum á Bessastöðum
Nýsköpunarverðlaun forseta Íslands 2026 hlaut Alexandra K. Hafsteinsdóttir sem fagnar með forseta Íslands og leiðbeinendum sínum hjá ÍSOR. Ljósmynd Arnaldur Halldórsson
Verkefni Hugo fékk einnig sérstaka viðurkenningu sem fagnar hér með forseta Íslands og leiðbeinendum sínum hjá ÍSOR. Ljósmynd Arnaldur Halldórsson

Aðkoma ÍSOR að 10 MW gufuaflsvirkjun styður við orkuskipti á Dóminíku í Karíbahafi

ÍSOR og HD ehf. hafa undirritað samning við DGDC Ltd. (Dominica Geothermal Development Company Ltd.) um eftirlit með gangsetningu og rekstri 10 MW gufuaflsvirkjunar á Dóminíku í Karíbahafi. Samningurinn tekur jafnframt til samantektar og úrvinnslu gagna um viðbrögð jarðhitakerfisins við vinnslu, sem rekstraraðila virkjunarinnar ber að skila eiganda jarðhitaauðlindarinnar.

Samvinna ÍSOR og HD ehf felst í að HD leggur til sérfræðinga á sviði gangsetningar, reksturs og viðhalds jarðhitavirkjanna og mun ÍSOR annast þá þætti sem lúta að gerð og eðli jarðhitakerfisins, efna- og forðafræðilegum eiginleikum þess, auk mats á viðbrögðum kerfisins við vinnslu.

Gufuaflsvirkjunin í Dóminíka

ÍSOR hefur komið að jarðhitarannsóknum á Dóminíku og veitt stjórnvöldum landsins ráðgjöf allt frá árinu 2010, sem felst meðal annars í borun og úrvinnslu gagna úr þeim sjö jarðhitaholum sem boraðar hafa verið á eyjunni. Holurnar voru allar boraðar af Jarðborunum hf. og þar af eru þrjár nýttar sem vinnsluholur og ein sem niðurrennslihola.

DGDC Ltd. starfar í umboði stjórnvalda Dóminíku og hefur umsjón með borholunum auk þess að vera eigandi jarðhitaauðlindarinnar og virkjunarinnar. 

Uppsett afl virkjunarinnar er 10 MW og mun raforkuframleiðsla hennar leysa af hólmi núverandi raforkuframleiðslu með díeselolíu. Verkefnið felur því í sér umtalsverða breytingu til hins betra í kolefnisbókhaldi Dóminíku, sem telur um 70.000 íbúa og er mikilvægt skref í átt að sjálfbærari og umhverfisvænni orkuframleiðslu á eyjunni.

Nýr Háhitadjúpsýnataki – framfaraskref með nýsköpun í rannsóknum og nýtingu jarðhita

ÍSOR hefur frá stofnun lagt ríka áherslu á rannsóknir, nýsköpun og þróun hagkvæmra lausna til að mæta áskorunum tengdum nýtingu jarðhita.

Nýjasta dæmið um slíka nýsköpun er háhita djúpsýnataki, sem er afrakstur umfangsmikillar þróunarvinnu í evrópsku rannsóknarverkefnunum REFLECT og COMPASS, sem voru styrkt af Horizon Europe, rannsóknaráætlun Evrópusambandsins. 

Djúpsýnatakinn er hannaður til að taka sýni af jarðhitavökva djúpt í jarðhitakerfum með það markmið að ná sýnum við allt að 400-500°C hita. Í þróunarvinnunni hefur djúpsýnatakinn verið prófaður til að taka sýni úr holum Orku Náttúrunnar og Orkuveitunnar.

ÍSOR teymið að störfum

Tækið var nýverið notað í fyrsta sinn í háhitaholum Landsvirkjunar á Þeistareykjum, þar sem tekin voru vökvasýni af mismunandi dýpum úr tveimur borholum.

Með þessari tækni er unnt að ná fram mun nákvæmari efnafræðilegum upplýsingum úr jarðhitakerfinu en áður hefur verið mögulegt þar sem venjulega eru eingöngu tekin sýni af jarðhitavökva á yfirborði. Slík gögn eru lykilatriði fyrir eftirlit, ástandsmat og langtíma skilning á þróun jarðhitakerfa.

Þau gera orkufyrirtækjum kleift að fylgjast betur með breytingum í jarðhitakerfinu, meta áreiðanleika kerfisins, áhrif niðurdælingar og styðja við sjálfbæra og upplýsta ákvörðunartöku til framtíðar.

Innleiðing háhita djúpsýnatakans markar því mikilvægt framfaraskref í notkun nýrrar tækni við íslenska jarðhitanýtingu og stuðlar að betri og sjálfbærari nýtingu jarðhitaauðlindarinnar.

Háhitadjúpsýnatakinn á leið niður í háhitaholu á Þeistareykjum

Hér fyrir neðan má sjá myndband frá deginum er djúpsýnatakinn var notaður í fyrsta sinn í háhitaholum Landsvirkjunar á Þeistareykjum.