ÍSOR, sem auk fjölþættrar starfsemi á Íslandi veitir vísindalega og tæknilega ráðgjöf á sviði jarðvísinda á alþjóðamarkaði og AGEN (Arctic Green Engineering Services) alþjóðlegt ráðgjafarfyrirtæki með aðsetur í Ungverjalandi á sviði jarðvísinda, verkfræði, tæknilegrar þjónustu og nýsköpunar, hafa ákveðið að sameina krafta sína í þjónustu sinni innan jarðvarmaiðnaðarins, með áherslu á Evrópu.
Forsvarsmenn fyrirtækjanna tveggja telja að samstarf þeirra, sem felur í sér hæfa og reynslumikla ráðgjafarþjónustu, geti stutt við fyrirtæki og stjórnvöld í Evrópu við að nýta frekar jarðvarmaauðlindir sínar.
Á jarðvarmaráðstefnunni Budapest Geothermal Summit, sem haldin var í Búdapest 26. september, undirrituðu Árni Magnússon, forstjóri ÍSOR, og Gábor Molnár, framkvæmdastjóri AGEN, yfirlýsingu þess efnis.
Bæði fyrirtækin hafa áratuga reynslu í bæði jarðvísindum og verkfræði innan jarðvarmaiðnaðarins og iðnaðurinn ætti að njóta góðs af sameiginlegri þekkingu þeirra.
Samstarfið hefur þegar tryggt verkefni sem hefjast á næstu vikum.
