2. september 2015

Nýtt jarðfræðikort

Jarðfræðikort af suðurhluta Norðurgosbeltisins.ÍSOR hefur gefið út nýtt jarðfræðikort af suðurhluta Norðurgosbeltisins, þ.e. Ódáðahrauni og nágrenni. Þetta er fyrsta nákvæma jarðfræðikortið af þessum landshluta og jafnframt þriðja kortið sem ÍSOR gefur út af gosbelti landsins.

Kortið nær til margra af helstu náttúruperlum landsins, s.s. Herðubreiðar, Krepputungu, Öskju, Kverkfjalla og Suðurárbotna. Einnig má nefna yngsta hraun landsins sem kom upp í Holuhrauni 2014-2015. Móbergsmyndanir og nútímahraun með gígum og gossprungum skipa stærstan sess á kortinu. Alls voru um 90 hraun aðgreind og þeim skipt í flokka eftir aldri og gerð m.a. með hjálp gjóskulaga.

Af öðrum myndunum má nefna flóðset við Jökulsá á Fjöllum sem vitna um mikil hamfarahlaup, lindir, lindasvæði og jarðhita. Sprungur og misgengi setja ennfremur mikinn svip á landið. Helsta nýnæmið með þessu korti er að nú er hægt að fá mun heildstæðari og nákvæmari mynd af jarðfræði svæðisins en áður, eins að mörg hraunanna hafa aldrei verið skoðuð eða skilgreind fyrr.

Kortið er beint framhald af jarðfræðikorti af nyrðri hluta Norðurgosbeltisins sem kom út  árið 2012.

Jarðfræðingarnir Magnús Á. Sigurgeirsson, Árni Hjartarson, Ingibjörg Kaldal, Kristján Sæmundsson, Sigurður Garðar Kristinsson og Skúli Víkingsson unnu að gerð kortsins. Guðrún Sigríður Jónsdóttir sá um kortahönnun.

Kortið byggist að hluta til á jarðfræðikortum í stærri mælikvarða sem unnin hafa verið fyrir verkkaupa ÍSOR og forvera þess, auk eldri útgefnum yfirlitskortum. Kotin hafa verið endurskoðuð og nýjum upplýsingum bætt við.

Bakhlið kortsins.Á bakhlið kortsins eru lýsingar og litmyndir af 23 áhugaverðum stöðum og þar á meðal eru náttúruperlur eins og Askja, Herðubreið og Kverkfjöll. Eldsumbrotunum 2014-2015 er einnig gerð skil.

Hér er hlekkur á þau jarðfræðikort sem ÍSOR hefur gefið út.

Kortið verður til sölu í helstu bókaverslunum og á upplýsingamiðstöðvum um landið. Hægt er að panta kortið í vefverslun Eymundsson .