23. júní 2004

Sex skip á sjó í sumar

Sumarvertíðin verður annasöm hjá hafbotnshópi Ísor sem hefur umsjón með þremur miklum rannsóknaleiðangrum í sumar. Tilgangur þeirra er að kanna gerð hafsbotnsins svo betur megi afmarka landgrunn Íslands í skilningi hafréttarsáttmála Sameinuðu þjóðanna. Þá koma til tvö verkefni sem varða auðlindakönnun fyrir norðan land:

  1. Skipið Akademik Lazarev gerir endurkastsmælingar til könnunar á setlagaþykkt í austurhlíðum Reykjaneshryggjar og í djúpinu norðaustur af landinu. Mælingafyrirtækið TGS-Nopec sér um verklega framkvæmd.
  2. Gerðar verða bylgjubrotsmælingar við norðurenda Hatton-Rockall-grunna til að kanna jarðskorpugerð. Leiðangurin er í tengslum við mælingar dönsku jarðfræðistofnunarinnar. Tvö skip verða notuð við mælingarnar, annað leggur  hlustunarstöðvar á hafsbotninn en hitt gefur hljóðmerki með loftbyssum. Sjá hér mynd af skotskipinu Polar Princess.
  3. Árni Friðriksson, skip Hafrannsóknastofnunar, gerir dýptarmælingar suður af landinu.
  4. Ísor tekur þátt í dýptarmælingum með mælingabátnum Baldri í Öxarfirði og nágrenni.
  5. Einnig stendur til að fara út á pramma til að ná sýnum af hafsbotni í Skjálfanda.