5. nóvember 2008

Mjög góður árangur af borun á Klúku í Bjarnarfirði í Strandasýslu

Óskar Torfason hitaveitustjóri (t.v.) og Árni Kópsson borstjóri (t.h.) virða fyrir sér heita vatns bununa. Ljósm. Jenný Jensdóttir.Borun við Klúku í Bjarnarfirði syðra í Strandasýslu er nú lokið og var árangur mjög góður. Holan er um 330 metra djúp og gefur um 16 l/sek af tæplega 50°C heitu vatni í fríu rennsli en um 25 l/sek með 10 metra niðurdrætti. Að boruninni stendur Hitaveita Drangsness með tilstyrk Orkusjóðs. Nægt vatnsmagn fékkst og er nú hægt að leggja hitaveitu á næstu bæi. Á Klúku var skóli en nú er þar rekið hótel og þar er einnig 25 metra sundlaug. Auk þess er þar gömul hlaðin baðlaug sem nefnist Gvendarlaug.
Íslenskar orkurannsóknir sáu um rannsóknir, staðsetningu á borholu og eftirlit með borun. Verkefnisstjóri af hálfu ÍSOR er Haukur Jóhannesson en Árni Kópsson boraði með jarðbornum Jökli.