20. október 2006

Kristján Sæmundsson kjörinn heiðursdoktor

Á Háskólahátíð á morgun þann  21. október verða kjörnir heiðursdoktororar og einn af þeim er Kristján Sæmundsson sem verið hefur starfsmaður Orkustofnunar og síðar ÍSOR um árabil.

Um kjör Kristjáns er fjallað á vef Háskóla Íslands og þar segir:

Doctor scientiarum honoris causa í raunvísindadeild

Kristján Sæmundsson er fæddur 9. mars 1936. Hann lauk doktorsprófi frá Háskólanum í Köln í Þýskalandi árið 1966. Doktorsritgerð hans, Vulkanismus und Tektonik des Hengill-Gebietes in Südwest-Island, fjallaði um jarðfræði, eldfjallafræði og brotahreyfingar Hengilssvæðisins. Að námi loknu hóf Kristján störf á Orkustofnun, þar sem hann hefur haft yfirumsjón með jarðfræðikortlagningu og fjölbreyttum rannsóknum tengdum jarðhita.

Kristján Sæmundsson á að baki merkan feril sem vísindamaður á sviði jarðfræði Íslands, eldfjallafræði og jarðhita. Með rannsóknum sínum hefur hann stóraukið þekkingu okkar á uppbyggingu gosbelta og megineldstöðva landsins ásamt upptökum jarðhitans. Jarðfræðikort hans eru með því vandaðasta sem þekkist. Greinar hans og rit um sama efni endurspegla ennfremur yfirburðaþekkingu hans á fræðasviðinu. Niðurstöður rannsókna Kristjáns hafa haft afgerandi áhrif á fræðilegar hugmyndir manna frá árdögum landrekskenningarinnar og treyst undirstöður jarðhitanýtingar. Kristján var kosinn heiðursfélagi, Honorary Fellow, bandaríska jarðfræðafélagsins, Geological Society of America, árið 1993. Hann hlaut heiðursverðlaun Verðlaunasjóðs Ásu Wright fyrir jarðfræðirannsóknir árið 2003.

Auk hins fræðilega framlags hefur Kristján um árabil stýrt skipulagðri jarðhita- og kaldavatnsleit, staðsett borholur og stjórnað borverkum. Hann nýtur mikillar virðingar hérlendis fyrir ötult og óeigingjarnt starf sitt við jarðhitaleit fyrir fjölda sveitarfélaga og einstaklinga. Kristján hefur verið helsti ráðgjafi Vatnsveitu Reykjavíkur síðan 1980 og einnig stundað ráðgjöf erlendis, m.a. við jarðvarmavirkjanir á Azoreyjum, í Grikklandi, Kenýa, Kína og Tyrklandi.

Kristján er einstaklega ósérhlífinn kennari og ávallt tilbúinn að fræða og leiðbeina öllum sem til hans leita. Hann hefur komið að menntun og þjálfun stórs hluta íslenskra jarðfræðinga, sem stundakennari við jarð- og landfræðiskor á árunum 1971-1980 og sem leiðbeinandi rannsóknaverkefna. Hann á einnig stóran þátt í þeirri færni og þekkingu sem byggð hefur verið upp hjá Íslenskum orkurannsóknum og áður Orkustofnun. Kristján er í flokki virtustu vísindamanna á sínu sviði.

Af þessum sökum telur Háskóli Íslands sér það sæmdarauka að heiðra Kristján Sæmundsson með titlinum doctor scientiarum honoris causa. Sé það góðu heilli gjört og vitað.