3. júní 2013

Jöklakort af Íslandi

Jöklakort af ÍslandiÚt er komið á vegum Veðurstofu Íslands Jöklakort af Íslandi. Kortið sýnir útlínur allra jökla landsins og breytingar þeirra undanfarna öld. Jöklakortið er samvinnuverkefni Veðurstofunnar og ÍSOR.

 Jöklar setja mikinn svip á Ísland og hafa geysileg áhrif á vatnsbúskapinn. Í því hlýnandi loftslagi sem nú ríkir eru að verða miklar breytingar á jöklum. Þær verður að skrá og koma á framfæri.

Á jöklakorti af Íslandi eru settar saman útlínur allra jökla á landinu þannig að auðvelt sé að átta sig á útbreiðslu þeirra og umfangi breytinganna. Kortið sýnir mestu útbreiðslu jöklanna við hámark litlu ísaldar um 1890 og einnig hvernig þeir voru um aldamótin 2000. Á kortinu eru framhlaupsjöklar greindir frá hinum og merktar þær eldfjallaöskjur sem vitað er um undir jökli. Tilgreind eru örnefni á öllum þeim jöklum sem nafn hafa hlotið.

Bæklingur og örnefnaskrá fylgja kortinu. Þar er meðal annars greint frá stærð helstu jökla og stærðarbreytingum á 20. öld. Allt lesmálið er á tveimur tungumálum, íslensku og ensku.

Jöklakort af Íslandi nýtist ferðafólki jafnt og fræðimönnum. Kortið verður til sölu í almennum bókaverslunum og á helstu ferðamannastöðum.

Veðurstofan gefur kortið út en ÍSOR sá um vinnslu þess. Höfundar jöklakortsins eru Oddur Sigurðsson, Richard S. Williams Jr. og Skúli Víkingsson. Kortahönnuður er Guðrún Sigríður Jónsdóttir.