22. apríl 2014

Jarðvísindamenn ÍSOR fá viðurkenningu fyrir bestu fræðigreinarnar

Guðni Axelsson sviðstjóri kennslu og þróunar.Jarðvísindamennirnir Guðni Axelsson, Knútur Árnason og Gylfi Páll Hersir hjá Íslenskum orkurannsóknum, ÍSOR, auk Hjálmars Eysteinssonar hjá Reykjavík Geothermal, hafa fengið viðurkenningu Alþjóðajarðhitasambandsins (IGA) fyrir bestu fræðigreinar ársins 2014 tengdar jarðhitarannsóknum.

Alþjóðajarðhitasambandið veitir á hverju ári verðlaun fyrir bestu jarðhitavísindagreinarnar og er tilgangur verðlaunanna að efla rannsóknir og útgáfu slíkra greina á sviði jarðhitarannsókna. Miðað er við að greinarnar hafi birst í alþjóðlega viðurkenndu, ritrýndu vísindatímariti sl. 5 ár.  Mat er lagt á mikilvægi, nýbreytni, frumleika, framsetningu og hagnýt gildi viðfangsefnisins.

Grein Guðna Axelssonar fjallar um sjálfbæra nýtingu jarðhitans.
Í áliti dómnefndar segir að sjálfbærni sé lykilatriði þegar reynt er að meta mögulegt framlag jarðhitans til að draga úr umhverfisáhrifum orkunýtingar. Í grein Guðna eru settar fram viðeigandi skilgreiningar, birt fræðileg greining á grundvelli reynslu frá  ólíkum jarðhitasvæðum víða um heim auk þess sem farið er yfir helstu atriði sem þarfnast frekari rannsókna. Þá er fjallað um hve langt inn í framtíðina skuli setja tímamörkin þegar fjallað er um sjálfbæra jarðhitanýtingu og bent á að eðlilegt sé að miða við 100–300 ár.Knútur Árnason jarðeðlisfræðingur.
Greinin birtist í tímaritinu Geothermics árið 2010 og nefnist „Sustainable geothermal utilization – Case histories; definitions; research issues and modelling“. Hægt er að nálgast greinina hér.

Grein þeirra Knúts Árnasonar, Hjálmars Eysteinssonar og Gylfa Páls Hersirs fjallar um einvíða og þrívíða túlkun viðnámsmæligagna frá Hengilssvæðinu á Íslandi. Í áliti dómnefndar segir að viðnámsmælingar séu ein öflugasta aðferðin til jarðhitarannsókna. Í greininni er fjallað um nýja nálgun við notkun viðnámsmælinga með áherslu á túlkun gagna með líkönum í einni og þremur víddum. Greinin tekur fyrir jarðhitasvæði á Íslandi þar sem styrkur viðnámsmælinga hefur verið staðfestur auk þess að byggja á sameiginlegri túlkun viðnámsgagna og annarra jarðeðlisfræðilegra gagna.
Greinin birtist í tímaritinu Geothermics árið 2010 og nefnist „Joint 1D inversion of TEM and MT data and 3D inversion of MT data in the Hengill area, SW Iceland“. Hægt er að nálgast greinina hér: http://www.sciencedirect.com/science/article/pii/S0375650510000039

Gylfi Páll Hersir jarðeðlisfræðingur.Alþjóðajarðhitasambandið (International Geothermal Association) var stofnað 1988. Meðlimir þess eru um 5200 frá um 65 löndum. Sjá nánar frétt á vef IGA.