27. október 2008

Góður árangur við borun á Krossnesi á Ströndum

Jarðborinn Klaki á borstað á Krossnesi. Ljósmynd Jón Guðbjörn Guðjónsson Litlu-Ávík.Borun eftir heitu vatni á Krossnesi í Árneshreppi er nú lokið og var árangur mjög góður. Holan er um 90 metra djúp og gefur um 15 l/sek  af um 65°C heitu vatni. Að boruninni standa Árneshreppur, með tilstyrk Orkusjóðs, og bændur á Krossnesi. Nægt vatnsmagn fékkst og er nú hægt að leggja hitaveitu inn í Norðurfjörð en þar eru miklar byggingar. Íslenskar orkurannsóknir sáu um rannsóknir, staðsetningu á borholu og eftirlit með borun. Verkefnisstjóri af hálfu ÍSOR er Haukur Jóhannesson en Árni Kópsson boraði með jarðbornum Klaka.