29. mars 2010

Ársfundur Íslenskra orkurannsókna 2010

Ársfundur ÍSOR var haldinn föstudaginn 19. mars í Víðgelmi í Orkugarði. Iðnaðarráðherra, Katrín Júlíusdóttir, ávarpaði

fundinn og Ólafur G. Flóvenz forstjóri fór svo yfir starfsemi ÍSOR á liðnu ári.Ólafur greindi frá því að síðastliðið ár hefði einkennst af mikilli lækkun tekna vegna samdráttar í orkuiðnaði landsmanna. Þetta hefðu verið mikil umskipti frá árinu á undan, sem var hið annasamasta í sögu ÍSOR, og í raun endir á samfelldu vaxtarskeiði frá árinu 1996. Á árinu hefði mikið verið unnið að úrvinnslu gagna og markaðsöflun erlendis efld til muna svo eitthvað sé nefnt. Flutt voru sex erindi á ársfundinum, öll af ungu jarðvísindafólki hjá ÍSOR.

  • Hugmyndalíkan af jarðhitakerfinu í Kröflu:  Anette Mortensen jarðfræðingur
  • Hitalíkan af Kröflukerfinu:  Sæunn Halldórsdóttir forðafræðingur
  • Nýtt jarðfræðikort af SV-landi:  Sigurður Garðar Kristinsson jarðfræðingur
  • Gerð þrívíddarjarðfræðilíkans af Hellisheiði:  Steinþór Níelsson jarðfræðingur
  • Leit að misgengjum með þyngdarmælingum:  Arnar Már Vilhjálmsson jarðeðlisfræðingur
  • Nýr tækjabúnaður til rannsókna í borholum:  Ragnar Ásmundsson eðlisfræðingur

Dregið var verulega úr umfangi ársfundarins í sparnaðarskyni og var fundurinn ekki auglýstur né eins mörgum gestum boðið og verið hefur. Erindin sem flutt voru á fundinum verða sett á vefinn innan tíðar.

Ársskýrsla ÍSOR kom út sama dag en með breyttu sniði því hún var gefin út bæði á íslensku og ensku. Hana er hægt að nálgast hér.